CONCERTO NO AUDITORIO MAR DE VIGO

5 de Marzo 2017

O domingo 5 de marzo a coral Stella Maris de Priegue - Nigrán, actuou en Vigo, no magnifico auditorio “Mar de Vigo”, no marco das xornadas organizadas por ACOPOVI, como coral invitada.

Asistín como público en dita actuación  e podo dicir que foi realmente estupenda, moi aplaudida e seguida con entusiasmo por un auditorio cheo, aínda que era a derradeira actuación da xornada e o público podería amosar cansazo, pero non foi así. Penso que as actuacións de Stella Maris sempre son amenas e encantan a un público diverso en gustos e idades.

Todos os coros invitados cantaban cinco cancións, que neste caso foron: Perdón, Que canten los niños, O mio babino caro, Viento del norte y Torres de Compostela... todas elas cancións emblemáticas desta coral. Penso que a máis aplaudida foi “que canten los niños”, sobre todo pola colaboración dun grupo de nenos e nenas, xa habituais nalgunhas actuacións de StellaMaris, e que engadiu unha nota de frescura e orixinalidade ao festival, ademais de que os nenos o fixeron realmente ben e que a canción é moi bonita e de sobra coñecida por todos.

Pero non podemos deixar de destacar a estupenda actuación en “o mio babino caro” e a gran ovación que se recibiu, pola súa complexidade e pola magnifica actuación da solista  Esther Licer,  que coa súa marabillosa voz estremeceu ao auditorio.Como colofón final, “Torres de Compostela” interpretada pola magnífica voz de José Ángel e o acompañamento do resto do coro e a gaita de Felipe. Estupenda.

E por suposto non podemos esquecer a magnífica labor de Loli, a directora do coro, e dos músicos que acompañan e completan unha actuación distinta das demais, emocionante, amena e moi ben interpretada, axudada pola gran calidade acústica do auditorio.

Esperemos que este tipo de festivais sigan realizándose porque teñen un público fiel e hai moita xente dedicada ao canto en corais en case todas as parroquias da nosa xeografía.

Marga                                             10 de Marzo de 2017