Nós, colocados a esquerda do altar, nun espazo no moi
grande para cantores e instrumentos, estabamos algo nerviosos. Moitos ensaios,
feitos con entusiasmo e tamén sacrificio, pero sempre queda a intriga do
directo, algunha cousa que poda alterar o ensaiado, algo que poda xurdir a
última hora...
Pero todo foi desenvolvéndose con normalidade, pese á
calor e a gran cantidade de xente. Ás 9,30 empezou a misa e cantamos o noso
repertorio con todo o noso corazón e cariño, especialmente a canción dedicada á
Virxe: “A ti, Inmaculada”, moi ensaiada neste último mes. As cámaras da
televisión diante nosa, pero tentamos non distraernos e prestar atención á nosa
directora, como sempre tan eficiente e pendente de todo.
E rematou a misa. Saímos ao fresco da noite e miramos os
preparativos da procesión, que foi poñéndose en marcha, pouco a pouco. Moita
xente, policía e unha banda de música acompañaban á Virxe do Carme que, como
non, vai dentro dunha barca e cun faro detrás en alusión aos mares e aos
mariñeiros que protexe. Lentamente foron desprazándose ata o porto.
Nós, os de coro, adiantamos á imaxe para esperala xa no
porto. Alí colocámonos arredor da nosa directora e preparámonos para a chegada
da procesión. Esta vez o noso compañeiro Alex cambiou o teclado polo acordeón e
Mar tamén baixou a guitarra. Cando chegaron ao noso lado e pararon, empezou a
segunda parte da nosa actuación, tamén moi ensaiada: a salve mariñeira. Alí, co
ruído de fondo das olas rompendo na praia, nun espazo aberto, con tanta xente
arredor, non é doado cantar. Pero puxemos todas as nosas gañas e forza para que
este himno á Virxe gustara a todos e todas.
Como broche final, os fogos artificiais estallaron na
noite con todo su esplendor, preciosos. Mentres, mariñeiros da vila e as súas
familias tiraban coroas de flores ao mar en recordo de todos os mariñeiros
falecidos.
Magnifica noite, moi solemne, e bonita actuación do coro, que esperamos
seguir mellorando cos anos.
Marga 2 de Julio de 2014
No hay comentarios:
Publicar un comentario