ACTUACIÓN DA CORAL STELLA MARIS NAS FESTAS DO MONTE DE A GUARDA

                                                                       10 de Agosto 2015

O pasado 10 de agosto a nosa coral cantou na vila mariñeira de A Guarda, como peche ás famosas  “Festas do Monte”, declaradas de interese turístico de Galicia, cunha orixe celta e que se celebran desde 1913.

Xa pola mañá despregamento de medios para trasladar o monumental escenario, o estrado, os instrumentos, o equipo de luz e son... algo moi complicado e sobre todo moi traballoso, destacando a gran e sacrificada labor dos nosos compañeiros que traballaron sen descanso e as veces incluso con perigo para a súa saúde: noso compañeiro Pepe mancouse nun pé e a maioría deles estaban bastante queimados polo sol.

Os demais viaxamos en autobús a media tarde. A actuación estaba fixada para as 10, 30 da noite pero, coma sempre, tiñamos que probar son e quentar a voz. Logo, un pequeno tempo libre para tomar algo e cambiarse no autobús e xa ás 10 estabamos todos listos para subir ao estrado.

Dado o bo día (pero ventoso), non se fixera aínda de noite e non chegara moito público, polo que decidiuse pospoñer un pouco a actuación, ata ás 11 aproximadamente que comezamos, cunha peza instrumental interpretada magnificamente polos nosos músicos.O repertorio foi o mesmo que o pasado sábado no Torreiro de Priegue (agás “caballo de batalla”),  novas cancións que levamos todo o ano aprendendo e ensaiando e repartidas tamén en dúas partes: unha primeira máis seria, con cancións como “Meu amor é mariñeiro”, “Foliada de Nadela”, “Cuando un hombre ama a una mujer”...; Logo, un intermedio coa incrible actuación de Javier Fernández Mejuto e do tenor bilbaíno Iker Freire. O primeiro cantou coa coral “Luna de abril ” e só “América”. Iker abraiounos a todos interpretando “La donna è  mobile”, impresionante.

A alameda empezou a acoller cada vez máis e máis xente e , cando nós voltamos ao escenario xa cambiadas cun poncho máis festivo (cada unha dunha cor), impoñía ver a tanta xente escoitándonos. Eu creo que foi o público máis numeroso que tivemos na coral.

A segunda parte da nosa actuación  foi máis movida e divertida, a xente bailou con nos cando interpretamos “Lágrimas negras” ou  “Guantanamera”, canción coa que nos despedimos, todos cantado e bailando, agradecendo ao público e á comisión de festas o feito de pensar en nós para esta actuación tan importante. Un pouco antes, como sorpresa, un telón de auga correu diante do escenario. Un detalle máis do coidado da posta en escena e do gran traballo de algúns dos integrantes do coro. 

Tamén destacar a gran axuda de familiares e amigos que desinteresadamente colaboran a que todo marche convenientemente.

Era a hora dos tradicionais fogos con que rematan estas festas todos os anos. O espectáculo pirotécnico foi sensacional, un estupendo colofón á nosa actuación.

Marga                                    9 de Septiembre 2015